آیا امنیت (امن) د ژوند هر څه دي؟
امنیت (امن) د انسانانو په ژوند کې ډیره لویه ونډه لري، خو د انسانانو ژوند یوازې یوې برخې پورې تړلی ندی. که چیرې د امنیت (امن) برخه په پام کې ونیول شي او د ژوند نورو برخو ته هیڅ پام ونشي نو د ژوند انډوَل خرابیږي، په لنډمهاله او اوږدمهاله توګه په ژوند اغیزه کوي. د انسانانو په ژوند کې لومړنۍ اړتیاوې (خوراک، څښاک، ځای او ژوند جاري ساتل) تر ټولو اړینه برخه ده. د انسانانو لومړنۍ اړتیاوې په یو ځای کې که پوره نشي نو هلته که د نړۍ تر ټولو ښه امنیت (امن) هم وي نو بیا هم دا امنیت هیڅ مانا نلري. ډیری وخت داسې کیږي چې انسانان د لومړنیو اړتیاوو (د ژوند اولیه ضرورتونو) د پوره کولو لپاره د امنیت هیڅ پروا نکوي د خپل امنیت او د نورو خلکو امنیت په خطر کې اچوي تر څو خپلې لومړنۍ اړتیاوې او د کورنۍ لومړنۍ اړتیاوې پوره کړي. لومړنۍ اړتیاوې د انسانانو د ژوند مالي او اقتصادي برخو پورې تړلي دي. مالي او اقتصادي برخې هم د ژوند اړینو برخو څخه دي. امنیت (امن) هم د ژوند د اړینو برخو څخه یوه برخه ده د دې نه هم انکار نشي کیدلای. که چیرې یو څوک د خوراک او څښاک لپاره څه ونلري، په کور ناست او بیکاره وي؛ فکري، ذهني، روحي او رواني امنیت ونلري نو یوازې فزیکي امنیت (امن) څه نشي کولای.
لیکنه: عبدالرشید “صمد نجاب”