لیکنه ـ ریاض مقامزی
په ادبي نړۍ کې د نارینه وو ترڅنګ مېرمنو هم خپل قلمي قوت ښودلی. یو له دې مېرمنو اګاتا کریسټي ده. ددې لیکنې تر پایه به د نوموړې په اړه لا ډېر معلومات حاصل کړئ.
پېژندنه
د نړۍ په ښځينه لیکوالو کې د نوموړې په څېر ډېرې کمې مېرمنې پيدا کېږي، چې هومره شهرت ترلاسه کړي. بشپړ نوم یې اګاتا کریسټي "Agatha Christie" دی. په "۱۸۹۰م" کال کې یې، د انګلستان په دون شایر سیمه کې دې نړۍ ته سترګې پرانیستلې. د خپلې کورنۍ کشرۍ نجلۍ وه. له ښوونځي وړاندې یې له خپلې مور څخه زده کړې وکړې. اګاتا په دې اړه ویلي: "له خپلې مور څخه مې په کور کې رنګارنګ کارونه، اشپزي او نور درسونه زده کړل."
آغلې اګاتا په "۱۹۱۵م" کال کې، کله چې نوموړې ۲۵ کلنه وه د هوايي ځواک له یو افسر سره واده وکړ. خو داسې برېښي چې له خاوند سره یې اړیکې ډېرې خرابې وې او د ژوند ډېرې بدې خاطرې یې ځنې درلودې. د خپل ژوند د بدو خاطرو په اړه لیکي: "په ۱۹۲۶م کال مې خپل مور له لاسه ورکړه، په همدې کال بله ښځه زما پر مېړه مئينه شوه. له همدې امله مې د خاوند کور د تل لپاره پرېښود. د تېښتې پر مهال د رواني نا آرامۍ له کبله مې ټکر وکړ. همدې ټکر راته د میرګیانو ناوغي پيدا کړه."
له دې ستونزو وروسته نوموړې د اکسفورډ پوهنتون له استاد سره واده کوي او له خپلې دې اړيکې ډېره راضي ښکاري. اګاتا د پولیسو ناولونو په لیکلو کې ځانکړی استعداد درلود، نو ځکه خو د جنایت ملکه "Queen of Crim" لقب ورکړل شو.
آغلې اګاتا د خپل بریالي ادبي ژوند په بهیر کې ۷۸ پولیسي ناولونه، ۱۹ ډرامې او یو شمېر شعرونه ولیکل. همدارنګه ګڼې جایزې یې هم ترلاسه کړې. د مشهورو آثارو له جملې یې د "سپين آس"، "د الفبأ په ترتیب وژنه"، "پټ دښمن"، "قتل په اورګاډي کې" او ځينې نور د یادولو دي.
نوموړې له کامیاب ادبي ژوند وروسته په "۱۹۷۶م" کال کې د "۸۶" کلونو په عمر له دې نړۍ سترګې پټې کړې.