ليکنه: مفتي عبدالولي
د مسلمان په تکفير کې له حده زيات احتياط په کار دی! او بيا چې مسله هم منصوصي نه وي.
د نړۍ نږدې ټول ديني عالمان او د افتاء معتبرې ادارې ، لکه د سعودي عرب هيئة کبار العلماء، شيخ محمد العثيمين، شيخ ابن باز، شيخ صالح الفوزان، شيخ عبد المحسن عباد، د مصر جامعه ازهر ، د پاکستان اتلس سوه معتبره عالمان چې په سر کې يې مفتي رفيع عثماني، مفتي محمد تقي عثماني، دکتور عبد الرزاق، قاري حنيف جالندري او په سوونو نور راځي، د بنگله دېش، قطر، کويت، هند، افغانستان نورو هېوادونو عالمان پر دې خبره متفق دي چې د بريد هغه شکل چې بريدگر په کې تر ټولو لومړی خپل ځان وژني او په دغه بريد کې د هغه د ژوندی پاتې کېدلو احتمال يو سلنه هم نه وي او کله داسې هم وي چې يوازې خپل ځان ووژني، بل چا ته تاوان ونه رسولی شي؛ دغه بريد خودکُش دی، انتحار دی او ځانمرگی دی، لهذا حرام دی.
يو صاحب چې بې له کوم فقهي مذهب څخه د استنباط او استدلاله خلک يې يوازې په دې خبره هم کافر بللي چې دغه ډول بريد ته ځانمرګی، انتحار او خود کُش ووايي.
او ډېره تعجب خبره دا هم ده چې وايي يو سړی که جاهل وي او د خپلې ناپوهۍ په وجه، هسی له خلکو څخه د اورېدو په وجه او پر حقيقت د نه پوهېدو باوجود دغه ډول بريد ته خوډکش ووايي نو سخت ګناهګار دی.
نو چې سړی ناخبره او جاهل دی، بيا څنګه سخت ګناهګار شو؟!
نو سړی حيران شي چې دوی له حنفي اصولو او دغې عظيمې فقهې څخه ولې داسې بې پروا او ناخبره دي.
د دغه صاحب دغه وينا د حنفي مذهب او د هغه پر اصولو يو سلنه هم نه ده برابره.
بيا تلبيس کوي او وايي چې که دغه انتحار دی نو بيا د صحابه کرامو جهادونه هم انتحار وو.
نه هیڅکله هم نه، د صحابه کرامو جهادونه کله هم خودکُش يا انتحار نه وو، بلکې د قرآن او سنت مطابق د رسول الله صلی الله عليه وسلم په راهنمایۍ کې د قربانۍ او فداکارۍ بې مثاله نمونې وو.
نو د هغه صف له علماء کرامو څخه احترامانه خواهش دی چې د دغه ډول خلکو سمه راهنمايي وکړي.