د ښه ملګري ځانګړنې!
په ټولنیز ژوند کې انسان له خپلې کورنۍ او نږدې خپلوانو وروسته پر خپلو ملګرو ډاډه وي. په رښتيا هم "ملګري" زموږ او ستاسو په منفي او یا هم مثبت بدلون کې رغنده رول لوبوي. که ملګري مو ښه وي، تاسو هم مثبت بدلون کوئ او که بد وي نو بدې کړنې به زده کوئ.
په دې وروستيو کې اکثره خلک له خپلو ملګرو سرټکوي. شکایت ترې لري او خوښ نه دي. اصلي علت یې دا دی، چې د انتخاب په وخت کې یې فکر نه وي کړی. په دې لیکنه کې به تاسو د ښه ملګري ځانګړنې ولولئ. ترڅو په راتلونکي کې د ملګرو په انتخاب کې خورا دقیق اوسئ.
د ښه ملګري ځانګړنې
ـ ښه ملګري هڅه کوي، چې نورو ته مو ښه معرفي کړي. دومره ښه چې تاسو هم خپل ښه والي ته حیران شئ.
ـ ښه ملګری ستاسو عیبونه درته په ګوته کوي. بد ملګري برعکس وي، هغوی ستاسو ستونزې ددې پر ځای چې تاسو ته ووایي، نورو ته وايي.
ـ ښه ملګري مو په نشتون کې ملاتړ کوي. مخامخ هرڅوک له تاسو دفاع کوي. مګر ښه ملګری هغه دی، چې په غیاب کې مو ملاتړی وي.
ـ په سختو ورځو کې مو ترڅنګ ولاړ وي. د ښې ورځې یاران بېخي ډېر وي. کله چې په ستونزه کې وئ او چا لاس درکړ، همدا مو ښه ملګری دی. له لاسه ورکول یې لوی زیان دی.
ـ ښه ملګري هڅه کوي، سمې لارې ته مو برابر کړي. هغوی چې تل تاسو ته نصیحت کوي او له بدې لارې مو ژغوري قدر یې وکړئ. دا خورا ارزښتمن خلک دي.
ـ که له یو ملګري/ملګرو سره تاسو وخت تېر کړ. وروسته مو حس کړه، چې مثبت بدلون مو کړی، دا خلک له لاسه مه ورکوئ. ځکه چې په حقیقت کې ښه ملګري همدوی ته ویل کېږي.
ـ ښه ملګری تاسو ته ډاډ درکوي. ستاسو د کارونو د ښه والي لپاره مو تل هڅوي، ترڅو پر ځان باور ترلاسه کړئ او ښه وځلېږئ.
ـ خو یوه خبره باید هېره نه کړئ، چې که تاسو د ښه ملګري غوښتونکي یئ نو نور هم غواړي ښه ملګري ولري. موخه دا ده، چې هڅه وکړئ تاسو هم پورتنۍ ځانګړنې ولرئ ترڅو د نورو خلکو ښه ملګري اوسئ.
په وروستيو کې د ملګرتيا په اړه دا حکایت هم درسره ولولئ!
حکایت
وايي دوه ملګري په یوه دښته کې روان وو. په لاره کې یې شخړه شوه؛ یوه، بل په څپېړه وواهه. هغه چې په څپېړه وهل شوی و، پر شګو ولیکل:"نن مې ملګري په څپېړه ووهلم."
سفر ته یې دوام ورکړ. د اوبو ډنډ ته ورسېدل. پرېکړه یې وکړه، چې حمام به کوي.
هغه چې په څپېړه وهل شوی، ناڅاپه ډوب شو. خو؛ ملګري یې وژغوره. دا ځل یې پر تیږه ولیکل:" نن مې ملګري له مرګ وژغورلم."
ملګري یې وپوښتل:"ولې دې څپېړه پر شګو ولیکله او ژغورل پر تیږه؟"
ځواب یې ورکړ:"که ملګری دې خفه کوي، هغه باید پر شګو ولیکې، چې بادونه یې له منځه یوسي. نېکي باید پر تیږو ولیکې، چې هېڅ باد یې خراب نه کړي."